『プロメア』(PROMARE) – 熱血，燃燒到世界盡頭

各位安好嗎? 不知道各位的自閉生活過得如何? 明顯地減少外出變相就少左去睇戲，收工在家就是打機跟Netflix，脂肪正在召喚我……不過想講下最近入手的一部好戲：『PROMARE』。

什麼? 問我點解唔講 Birds of Prey? 如果你要看的話世界末日都阻唔到你是吧? 我覺得還好啦，比想像中好就只是不夠爆同 Huntress太少戲份，當 Harley Quinn版 Deadpool睇就得了。

說回正題，話說老早就想睇呢套作品，早在預告未出街就一直期待緊，雖然唔似得某16歲鐵路迷咁堅，期待左16年屯馬綫通車。但HKIFF又唔爭氣得勁少位就算加場都買唔到飛真係Fuck You Very Much。不過唔緊要，哥我有的是堅持，去唔到戲院睇乜買隻日版BD返黎叫埋朋友一齊睇囉，Blow me。??‍♂ (好彩唔係口罩無俾人扣查XD)

其實等睇都好正常，作為TRIGGER首部長篇動畫電影兼『天元突破』、『KILL la KILL』班底，基本上唔會點出事，但勢估唔到 XFLAG都有份做，可以期待一下 XFLAG之後於動畫界既發展。(可惜我無玩怪物彈珠……)

故事講述全世界突然開始大量出現能操控火焰的的變種人「Burnish」，普通人跟「Burnish」的對峙導致全球大燃燒，總人口減少一半。事件平息30年後，有一部份激進派變種人「Mad Burnish」對城市進行襲擊，針對「Burnish」而成立的部隊「Burning Rescue」奉命出動，展開連場激戰。

既然作品打著TRIGGER既旗號，故事又點會咁簡單，大橋唔穿喇，只可以講呢部作品無疑係流住 TRIGGER既純正血統。片長 111分鐘無悶場，感覺就好似坐左一次過山車High到出汁，戰門場面精彩爽快無比，比『KILL la KILL』更誇張更痴孖筋既漫畫式爆笑處理，總之熱血笑點樣樣齊，對於不認識 TRIGGER的觀眾來說『PROMARE』是一部非常出色的初體驗作品。

電影去年五月日本上映後評價一面倒好評，人氣高企令到戲院今個月第四度上映，而且仲係4DX版。但對於一眾老司機動畫老手來說實在有點美中不足。

首先是今作的原創性不足，看畢全片俾我既感覺就是監督今石洋之作品雜錦套餐一樣，好像『天元突破』加上『KILL la KILL』的混合濃縮版一樣，間接導致看過之前兩部作品既觀眾感覺平淡乏味；第二個間題就是作品節奏出事，明顯地『PROMARE』是走雙主角模式，但大部份篇幅都是落在 Galo身上，對於 Lio的描寫實在少得可憐，而Lio是一個很複雜既角色，比起笨蛋Galo更需時描寫，但礙於電影長度於是令到兩位主角都不能給人太深刻印象。其實這個世界觀的設定還有很多故事可以說，單單是「Burnish」同普通人既緊張關係已經可以寫到 Bryan Singer版「X-Men」。也許比起電影版，『PROMARE』更適合製成6話份量的OVA作品。

至於配音……別問了。

雖然好像批評了蠻多，但從總論而言我係非常之收貨，我比較傾向 TRIGGER想藉『PROMARE』嘗試新的映像技術。全片的顏色構成是近年罕見，更可以說是獨一無二：螢光橙、螢光黃、螢光紫、螢光綠，非常吸引眼球又唔會太突兀而且非常協調；向來動畫中只有3DCG扮2D，但『PROMARE』有不少畫面都是手繪2D扮3D，而且構圖上既細節都俾佢玩盡，趣味滿滿。點丫大佬，我從電影中見到一眾畫師玩得好開心喎，咩料? ?

畫面上真係無懈可擊，我俾夠100分滿分，再加埋澤野神今次超水準演出，配樂同畫面同步率係400%，畫面加音樂令人非常入戲。(澤野BB終於唔再9製神曲，而係根據作品需要去配樂，可喜可賀。)

完美既視覺同配樂享受、精彩絕倫的機人x異能大混戰、趣味滿滿的作畫細節跟充製作人員滿惡但不賣弄的微BL，『PROMARE』人氣爆燈不無道理，台灣都有上映但香港完全404 Not Found so9sad。能夠於戲院看固然最理想，否則留家跟三五知己一同爽看也十分爽皮。記得對上一次跟朋友們一齊坐係電視前看既已經係虚淵玄Godzilla三部曲，一路睇一路恥笑，真的很爽。