講漫畫 集結華文地區的美國漫畫同好！
利申：FGO玩家，型月粉
睇完前篇有左心理準備，今次入場睇埋後篇觀感好得多。(前篇真心唔敢講)
故事承接上集大英雄犧牲自己救左主角一行人，貝德維爾亦下定決心要親手打倒獅子王，於是聯合山之民以及法老王對聖都發動最初亦是最後既攻勢。
一般動畫電影可以分兩種：觀眾可以白紙一張入場觀看或粉絲向必須先了解原作先至睇得明，『神聖圓桌領域卡美洛』則係例外。完全無接觸過FGO遊戲既觀眾由於無作品背景認知下係完全唔可能睇得明，但作為粉絲亦睇到一頭霧水，真係多得編劇小太刀右京，不過我唔係想鞭屍。
鞭黎都無用，名家出身兼有業界超強家族關係，即使佢廢但仍會係動漫界打滾。但真心唔知佢想點，於既有故事上唔係改篇而係大搞原創劇情，如果對電影黎講係好既改編相信大家都唔係咁嬲，但當你無視人物設定將角色性格亂改只為推進劇情，難怪上篇上映後日本大炎上。
磨菇所寫既劇本雖說文筆唔算高超，但起碼流暢兼同時埋有伏筆及小情小趣，但係前後篇睇完後我可以斷定小太刀於劇本處理上係非常乏味無趣。只係為左一味推進劇情都算，為山景、金字塔同聖都畫咁多wallpaper想點，實在有d 浪費runtime，呢個就要怪罪前篇導演末澤慧。
末澤慧本身係作畫出身，所以對於畫面演出既功力相當乏力，加上佢並唔熟悉Fate系列，亦無玩過FGO，對於第六章既認識就只係來自舞台劇版，真心Holy shit。編劇將故事寫得支離破碎，導演亦趕住90分鐘講完一半故事，唔出事先奇……
後篇比起前篇多左一份優勢，就係有一半時間都係戰鬥場面，換言之後篇既破碎程度其實係少左好多。作為課長終於見到我地既資金用左係邊，慶幸開首一場「親子大戰」非常精彩，之後多場大戰可謂相當「有趣」，原因係……每一組對決既畫風都各有不同。(笑)
以「Tristan vs 哈桑s」及「高文 vs 小貝」兩場最為正常，「Lancelot vs Agravain」及「小莫 vs 三藏」兩場就相當…意識流？三藏寶具演出相當莫名其妙，但「Lancelot vs Agravain」一組既對決相信超越左《Fate/Apocrypha》第22話既作畫，Lancelot係整個變左方塊人……
值得一提係寶具「Rhongomyniad」既姿態跟遊戲第二部中關鍵既「空想樹」非常相似，唔知製作組到底係有意還是無意，可能一切都係魔菇既陷阱。(爆)
由宣佈到上映用左近三年時間，然後將遊戲第一部中最受觀迎章節變成水一樣淡，美術、作畫其實問題不大，但係劇本出事基本上已經救唔返，難怪粉絲們會嬲到大炎上。幸好後篇係以打戲為主令到成部戲娛樂性大增，電影將重點完全放係貝德維爾身上，雖然前篇對佢性格描寫錯誤，還好後篇有作出補救。
個人覺得如果第六章改為電視版，有更多時間慢慢描述各人物心態及詳細交待主角一行既旅程，而唔係三分鐘走完成個地圖，相信會比較容易令觀眾感受到佢地既艱難而唔係好似電影咁非常順利無任何阻礙達到目的，呢點第七章「絕對魔獸戰線巴比倫尼亞」可謂係做得唔錯，起碼表現正常。
7/10
之後就係最終章「終局特異點 冠位時間神殿所羅門」，真心希望香港會上，呢套我唔怕出事，因為無乜可能會出事。(笑)
