講漫畫 集結華文地區的美國漫畫同好！
經過2000年X-Men的一役後，2002年嘅《蜘蛛俠》可謂「樣版電影」，
以全CG + 真人嘅視效畫面於當時嚟講只係一個實驗，
始終當時嘅技術並未好似家陣咁細緻，整全CG好易會整咗個膠人出嚟，
點知完成品出嚟嘅效果又唔差喎，並且創咗業界先河，
以名為「Spydercam」嘅技術，也就是於大廈間掛上鋼索，
再以遙控操作控制攝影機於鋼索上快速俯衝及急升，
做到Spidey於大廈間盪嚟盪去嘅速度感。
完美嘅視覺效果，加上導演森雷米搞鬼嘅風格與平民英雄故事絕配，
《蜘蛛俠》嘅三部曲於上映其間打遍天下無敵手。
順帶一題，《蜘蛛俠》第一集IMAX版其實香港係做好咗字幕版，
本來諗住09年趁《變形金剛2》前嘅空檔期上映，
點鬼知人家竟然搬返《變形金剛》第一集嘅 IMAX出嚟，
個檔期無咗，IMAX版蜘蛛俠上映無期，底片到家陣都仲喺個倉度，可悲可悲………….
而Tobey Maguire就好似嗰條底片一樣，三部曲完咗之後就入咗倉近三年都冇浦過頭……..
Tobias Vincent Ironsides Maguire 出生於1975年6月，當時佢父母只係20歲及18歲，
父母離異後，兩歲嘅Tobey跟住媽媽經常搬家，
到咗中學時本來打算跟爸爸一樣當一名廚師，於是喺中學時期打算修家政，
但身為編劇及製片的媽媽卻給了Tobey100元去讀戲劇班，
自此，Tobey發現自己對演戲有著濃厚興趣。(阿媽好邪惡………)
結果為咗全心全意投入演藝，佢於中三時輟學。
Tobey 最早嘅時候係演出電視劇嘅配角或廣告為主，
後來到了92年嘅處境喜劇”Great Scott!”中首次擔任男主角，
可惜該劇播了13集便被腰斬了。
Tobey嘅銀幕生涯是由1993年開始。
因為去試鏡演”This Boy’s Life”而認識到佢嘅好兄弟Leonardo DiCaprio。
雖然Tobey落選，但Leonardo遊說製作公司俾Tobey演出一個配角，
如是這，Tobey第一次於銀幕前正式亮相。
二人相識近二十年，至今仍是好兄弟。
到咗 96年，Tobey得到佢第一個電影主角嘅機會，
喺呢一部”Joyride”中佢演一個汽車旅館的少爺仔，偶遇兩個入住嘅女殺手，
佢都拍過呢種青少年典型驚慄喜劇的說。
及後Tobey與幾位大導及出色嘅演員合作過。
97年先與李安合作演出《冰風暴》(Ice Storm)，
同年演出活地亞倫的《解構愛情狂》(Deconstructing Harry)，
飾演活地亞倫的角色後生版。
翌年客串演出”Fear and Loathing in Las Vegas”，與Johnny Depp有對戲，
飾演一名搭便車嘅旅行者，可是每次都遇上Johnny Depp，而每次相遇都冇好事發生……
最後一次相遇Tobey要棄行李逃跑……………………………………………………..
1998年Tobey於另一套電影當主角，在《一人有一點顏色》(Pleasantville)中，
佢同影后Reese Witherspoon演姊弟，同現實生活格格不入嘅二人，
因意外進入咗電視劇嘅世界裡，成為咗劇中人物。
而喺呢個黑白嘅世界裡，一直都非常故步自封，由現實嚟到既二人，
為呢個世界帶來許多文化衝擊，最終令呢個世界大放色彩並充實起來。
呢部電影可謂係Tobey嘅代表作之一，
皆因電影整體出色嘅表現令到觀眾非常印象深刻，
電影更被視作一代經典。
1999年可謂係Tobey嘅突破年，因為接住落嚟既幾部戲都大受好評。
首先係再同李安合作嘅《亂世恩緣》(Ride With The Devil)，
講述美國內戰期間，情同手足嘅兩兄弟及一個女人之間恩怨情仇嘅故事。
2000年的《總有驕陽》(The Cider House Rules)中飾演一個孤兒荷馬，
於墮胎醫院兼孤兒院長大成人，並且由院長米高堅教授一切醫學知識，
但善良嘅荷馬唔忍心接管孤兒院及醫院，於機巧合之下離開到一個蘋果園工作，
體會到人生的喜悅與悲傷後，荷馬終於找到自己嘅使命。
呢部電影中唔單止Tobey有非常出色嘅表現，故事亦十分出色，
而我亦睇咗不下於數十次………
但要論我最愛，莫過於2000年嘅呢部”Wonder Boys”。
於呢部電影中，Tobey 一次過同米高德格拉斯、羅拔唐尼、「湯嫂」Katie Holmes合作。
故事講述由德格拉斯飾演嘅大學教授Tripp於七年前寫下一本驚世小說，並奪得大獎，
人人都以為佢有完美嘅人生，過著無憂無慮嘅生活。
但七年後，佢苦無頭緒再寫另一本小說，
正確而言係諗唔到點樣幫呢本寫咗幾年長達2611頁嘅小說埋尾。
同時間佢架車俾人偷咗、老婆走咗，自己嘅女學生(Holmes)諗盡方法去引誘佢、
編輯Crabtree(唐尼)又嚟到崔佢交稿，同時間又搞大埋老闆老婆個肚，
神秘學生James(Tobey)又跟蹤佢跟到出面，兼錯手殺咗情婦隻狗，
世界大亂，到底Tripp如何解決?
“Wonder Boys”係一部極其出色又荒謬到極點嘅處境喜劇，
本來有著文學少年氣質嘅Tobey就係演一名有寫作天份嘅憂鬱男，
最重要嘅係，佢同羅拔唐尼有床上戲……………………………………….囧rz
In case各位唔知，佢喺《雷霆喪星》(Tropic Thunder)中嘅戲中戲又同唐尼玩嘢，
大搞同性曖昧gag，實在係笑到甩肺……………………………..
2000年有一部神秘作品於美國以外地方上映，呢部片名為”Don’s Plum”，
據了解係一部超超超低成本嘅電影，故事唔知講乜，
基本上卡司就係Tobey有關的好友及前拍檔，
如Leonardo、”Great Scott”中合作過嘅Kevin Connolly。
影片於1995年拍攝，但當時有如此卡司嘅條件為影片不得於美國上映，
2000年時於歐洲各國發行影碟及上畫，後來電影公司眼見兩人經已紅起，打算在本國上映，
Tobey及Leonardo兩兄弟聯手控告片商，所以說大牌演員敵不過……………
雖然有著出色嘅表現，但對Tobey嘅名氣沒什麼幫助，
2002年佢終於遇上一個令佢爆紅嘅機會 – 蜘蛛俠。
Spidey作為一個非常經典嘅漫畫角色，本身佢嘅吸引力已經唔低，
再加上當年嘅技術於21世紀令經典重現銀幕上，Fans們可開心死了。
當年美國本土嘅票房達到4億，係2002年票房之冠。
對很多觀眾而言，完全冇頭緒Tobey到底係喺邊度爆出嚟，
總之Tobey所演嘅Peter Parker既善良又體貼，文質彬彬兼有幾份憂鬱味，
很多觀眾一時間迷上了這個「新演員」。
2003年佢就減去咗一身肌肉，變成瘦弱嘅騎師。
改編自真人真事，
《壯志奔騰》(Seabiscuit)講述一個有缺憾嘅騎師同一匹有缺憾嘅馬匹如何創造傳奇。
電影拍得非常荷里活，勵志，但公式，卻不失為一部不錯嘅運動電影。
2004年再次穿起戰衣，先前嘅第一集取得好成績，第二集亦落重本。
《蜘蛛俠2》嘅特技、動作加碼，而且故事上由於不用再交待Peter嘅出身，
自然有更多空間去描寫佢嘅生活。
Marvel作品一向比較Down to Earh平民化一點，著重深入淺出，
不說八爪魚博士，單說Peter忙到嘔電，又冇錢生活，仲要兼顧Spider-Man行俠仗義，
連脾氣好到似佛祖嘅 Peter都大叫「唔撈喇!!!」
被譽為三部曲中最好睇嘅一集，相信係因為大家都有「劈炮唔撈」嘅念頭。
2006年Tobey一改戲路演奸角，
於《柏林暗戰》(The Good German)中與佐治古尼演敵對嘅主僕關係，
可是不少影評指出全片嘅敗筆之處就係Tobey……………………………
2007年佢第三次，亦係最後一次穿上戰衣，不遺今次穿咗兩件。
《蜘蛛俠 3》(Spider-Man 3)有著全系列最複雜嘅故事線，
同時亦係全系列嘅高潮所在，因為Spidey嘅宿敵 – Venom於該集現身。
老實講，好多人都認為第三集有如爛片，但我倒覺得可以接受沒差呀?
首先寄生體會增強宿主嘅侵略性，
但問題係Peter本身係一個與世無爭嘅人，難免會變咗一個傻佬。
而且最終戰嘅二對二實在設計得很出色，動感+速度感+緊張度，
單單係動作方面已經替第三集挽回唔少分。
好吧，我同意第三集比起第二集差這個事實，
但各位唔知又有冇留意到其實導演都唔係咁想加Venom落電影版度?
唔難發覺森雷美喺沙人嘅故事線上係俾多心思過Venom，
說到底，本來森雷米想要嘅角色為Vulture，
Venom係電影公司嘅要求，導演都係打份工啫。
所呢隻Venom戲份不夠之餘，亦好細隻………………………..
不過Venom之爭就直接令到整個電影版班底四分五裂，Good Job Sony。
其實片酬問題都係假，Sony會俾唔起?
導致Spider-Man 4要Reboot嘅原因都係鬧不和。
Venom 加咗入電影中，電影公司得米，於是再變本加厲，
喺第四集籌備期間，無知會導演單方面聯絡Anne Hathaway，
希望佢演出「Black Cat」一角，與蜘蛛俠談情，
想加Vulture想到喊嘅森雷米，已經搵咗賓京士利嚟演，
結果一句唔該，劇本要重寫，今次唔單止蜘蛛俠，
連女主角同導演都齊齊話「劈炮唔撈」。
公平咁講一句，完全寫實黑暗化係潮流所趨，
但到底Spidey又是否適合呢種風格，新版又是否比舊有三部曲好，
一切都言之尚早，但敢肯定嘅一件事，
冇咗森雷米嘅Spidey三部曲，一定開唔成”The Amazing Spider-Man”先，
因為之前嘅三部舊作已經為Reboot版打咗底，
再講三部曲嘅鏡位運用、動作設計都係有著非常高水準，
所以三部曲有著必要嘅存在價值。
反正Tobey都已三十歲高齡(笑)，唔做Spidey演文戲囉。
2009年嘅《雙情路》(Brothers)佢狂減磅，演一個俾恐怖份子俘虜嘅美軍，
返家後患上咗創傷症，但家人老早以為自己已經死掉，
老婆同細佬看似有路，到底呢個精神創傷如何危及家人安全?
拍完最後一部電影，我仲以為佢退咗休。
皆因佢四年前迎娶環球影業CEO個女Jennifer Meyer，
兩人仲有一仔一女，近幾年Tobey樂做湊仔公。
只係間中做下製片咁，好似”Country Strong”、”Seeking Justice”。
雖然銀幕上嘅Tobey係一個溫文有禮嘅好男生，
但現實生活中嘅佢，不但爛賭同時亦非常脾氣暴燥…….
佢較早時候就因為非法賭博而惹上官非。
而作為Fans亦要少心一點，唔好貿貿然行近佢問佢攞簽名同影相，
隨時相機都打爆你…………………………………………………………..
