講漫畫 集結華文地區的美國漫畫同好！
2012年的確係好重要嘅一年，人人都話係世界末日，
well，假如係真嘅話末日前好多地球人嘅願望之一都可以喺死之前達成，
因為對於一眾fans嚟講，喜悅遠比驚恐多。
仲有四日，香港嘅朋友可以率先欣賞到宇宙最強英雄電影《復仇者聯盟》(The Avengers)，
一套唔知幾多人等到頸都長先等到嘅Cross-over電影，
短短五年內可以重整漫改電影喺市場上嘅整架構兼完成呢部電影可以話係一個奇蹟，
全因呢班英雄全部都能夠獨當一面，而且充滿個性，
如今呢班人氣角色集結起來，要統領佢地嘅人物/演員一定要有返咁上下份量先騎得住佢地，
當然指嘅係無論戲裡戲外。
Nick Fury呢個角色唔需要多講，作為神盾局局長其戰績可謂係傳奇級，
而唔知係咪老早為咗電影版，Nick Fury呢個角色由白人變咗做黑人，
個樣更加係Samuel L. Jackson嘅倒模，咁當然唔使講由返SLJ做返啦。
此舉動非常合情合理，
喺一眾演員之中要睇落唔算太老又要好抽而且最重要係一行出嚟個型要壓到場，
點計都只有SLJ一個做得到。
普遍觀眾或者以為SLJ只係黑人演員中嘅大阿哥，但其實SLJ嘅份量遠超於此。
如果說黑人嘅女中豪傑為奧花雲費，咁與佢對等嘅黑人男性就係SLJ。
Samuel Leroy Jackson生於1948年12月21日，田納西人，
係家庭中嘅獨生子，母親係一個工廠女工，SLJ可以話係與母親相依為命，
因為喺佢嘅人生中只見過佢父親兩次，
更因為酒精中毒而逝世，大概可想像得到SLJ嘅成長環境。
由於母親嘅嚴格管教，SLJ係一個優秀嘅學生，
喺佢中學時更加係字校交響樂團嘅成員，演奏法國號及小喇叭。
SLJ首次接觸到戲劇係喺佢於喬治亞州讀大學時、為咗額外學分而加入戲劇小組，
自此佢發現咗自己對於演戲有濃厚興趣，
於是更加將自己嘅主修科由建築(在這之前的主修科為海洋生物學)轉為戲劇。
喺SLJ開始佢嘅演藝生捱前，佢係一個非常活躍嘅黑人民權份子，
遊行示威多過食飯，但一切源於1968年。
當年馬丁路德金被刺殺，SLJ就係喺佢嘅葬禮上擔當帶位員。
而唔知馬丁路德金係咩人嘅朋友請去跪牆角。
SLJ對於刺殺事件非常憤怒，於是投身於平等運動以及抗爭之中。
最大鑊嘅一次係聯同幾個同學因為唔滿意學校嘅某D政策，
於是將大學嘅董事局成員禁錮於校園內。雖然最後大學方面讓步改變政策，
但由於非法禁錮紿終係重罪，SLJ最終都被停學兩年，不過後來學校都准許佢完成學業。
就喺佢停學期間，SLJ於洛杉磯被聘請為社工。(囧……….)
後來佢回到亞特蘭大，並於當地認識到幾位活躍嘅黑人民權運動份子，
而且整個運動都愈演愈激烈，後期更變為武裝抗爭，
正當SLJ所屬嘅組織都開始帶備槍械之際，J媽出手制止SLJ陷入其中，
說到底SLJ最敬愛嘅係母親。
就喺呢個時候佢重返校園完成學業，此後便投身於演藝事業中，但這是後話。
同其他新仔一樣，SLJ都經歷過以副業維持生計嘅階段，
佢曾經做過doorman以及其他工作。
而佢亦都曾經好似RDJ一樣，受毒品及酒精問題困擾，
當佢戒得一乾二淨時就係佢演藝生捱突破之日。
佢同太太LaTanya Richardson於1980年結婚，二年後育有一個女兒。
而據佢本人所講，D 人成日將佢同《廿二世紀殺人網絡》
嘅黑人演員Laurence Fishburne搞錯，令佢吐血。
但最要命嘅，係人人都以為佢鐘意爵士樂…………..OTZ
1975年的某個廣告中有佢登場
撰於22 April 2012
