[雜談]《時光之輪》(The Wheel Of Time)第一季觀後感

無街去唯有搵野睇,之前已經得知有呢部作品但一直無時間,今日終於完食,點講好呢,睇完又真係覺得非常極之一般貨色,故事平淡老土無驚喜,我想搵一篇完整觀後心得都無,原因好簡單,因為無人睇……先睇睇故事講乜。

世界被時光之輪支配,世代人物只會不斷輪迴,而呢個世界存在著一種至高無上的真源力量『無極力』,凡可觸碰無極力的人都學習「引導」(控制),成為「兩儀師」,換言之等同魔法師。男人操控「陽極力」、女人操控「陰極力」。另一方面被創世主封印暗帝一直想統治世界,上一輪世界第二時代無極力之戰中被稱為真龍的男人打敗暗帝,但陽極真源卻被黑暗污染,導致往後所有男性只要接觸真源就會發瘋暴走而亡。

時值第三時代,相隔千年後預言指出真龍經已轉生,並於最終大戰中會跟暗帝交鋒拯救人類並導致世界往下一輪迴,光明兩儀師沐瑞於邊境村落找到五個有可能是真龍轉生的少年少女,並帶領他們踏上一場正邪抗爭的救世之旅。

咁首先讚下呢部劇有乜優點先,費事俾人話我Hater。

呢部作品係Amazon重金打造,最能夠感受到既兩個部份就係攝影以及美術。劇集有大量「外景」,但當然大部份都係CG合成,對於景觀處理真心幾有魔戒電影版既感覺,從而我地可以期待一下之後Amazon推出既另一部劇《魔戒:力量之戒》既拍攝;而作為魔幻題材作品,對於道具、建築物及服裝亦可見落左一番功夫,當中女主角沐瑞的裝束可謂相當出色,甚有霸氣,配合角色莊嚴既性格。

But,講得個But字都知以下係缺點,戰門時既特效可謂有d難頂,使用無極力既動作其實似降世神通,兩儀師好似跳舞咁擺動全身,然後一束束絲線般既白色無極力就會由畫外伸延纏住施術者及施放目標,視覺上幾新奇但效果真心麻麻。

明顯地小說作品既Scale根本比起劇集係大好幾倍,大過Game of Thrones,宜家成品可見既係忙於將大量設定塞入觀眾個腦,所有野都係水過鴨背過於皮毛,留唔到深刻印象。

另一個死症係人物過多,本身群戲無乜問題,問題在於改幅過大導致千絲萬縷既人物關系被破壞,每個角色改少少令到故事處理非常散亂兼有d 唔make sense。全片真心靠Rosamund Pike一個撐起,五位少年少女演技真心有待磨練。

總括而言,就第一季黎講《時光之輪》成功介紹左各個人物同世界觀以及遊戲方式,但當中劇情真心比較簡單平淡,特別係全季只有8集令人質疑點解唔花多d時間描寫各人心理變化還是說單係做特效已經用哂資金?對故事處理欠佳亦令人為之後既重頭戲魔戒前傳感到擔憂。不過如果有空閒想睇下奇幻題材消磨時間,《時光之輪》都不失係一個唔錯既選擇,反正未開播已經訂左第二季,起碼唔怕睇完第一季就俾人砍,但根據第一季既表現有無第三季真係好難講。

PS:每一套奇幻作品都有自己既風格,呢一套其命名真心有趣,角色名唔望住我都唔識讀,d 專有名詞亦很有趣,舉個例,暗帝既崇拜者,會為佢做牛做馬既就叫做「暗之友」(Dark Friends)。(笑)

6.5/10

關於 Jacky.TalkComic

由電台跳到網台,由紙媒跳到電媒。電影,電視劇,動畫,遊戲,音樂,模型,Figure全修,吹水唔抹嘴的癲喪毒廢一名。

發表迴響

這個網站採用 Akismet 服務減少垃圾留言。進一步了解 Akismet 如何處理網站訪客的留言資料