首頁 > 影視娛樂 > 誰是蜘蛛俠

誰是蜘蛛俠

55年前,在Stan Lee與Steve Ditko筆下,Peter Parker,一個15歲少年,自從在科學展中意外被一隻身中幅射的蜘蛛咬傷後得到一身驚人的超能力,成為了風行全球的超級英雄—-Spider-Man。

 

 

過往55年間,有不少人參與了Spider-Man故事的創作,動畫和真人影視作品也出了不少。在過往15年內,單單是真人電影都推出了6部(不包括Captain America: Civil War),Spider-Man也換了3代。不同作品對Spider-Man/Peter Parker的演繹也有不同。但是,到底誰才是真正的Spider-Man/Peter Parker呢?

 

With Great Power There Must Also Come Great Responsibility

 

 

如果Uncle Ben冇被槍殺,可能Spider-Man會一直留在電視台表演賺錢。但Peter在電視台的袖手旁觀,令一名小偷逃脫追捕,間接害死Uncle Ben。Uncle Ben的死,讓Peter上了一課,明白了能力與責任的重要。自責係Peter成為超級英雄的主因,「如果我有出手捉住個賊仔,Uncle Ben就唔會死」,「如果我當日唔係去左表演,我就可以阻止呢一切」。Peter明白自己有能力去阻止呢啲悲劇再次發生,亦有責任去阻止,With Great Power There Must Also Come Great Responsibility。

 

Self-doubting Hero

 

 

自我質疑亦都係Spider-Man其中一個十分重要嘅元素。一如所有青少年,初出道的Peter經常會自我懷疑,到底自己夠唔夠料去做超級英雄呢?到底自己可唔可以好好照顧Aunt May呢?甚至到與MJ結婚後,加入了Avengers,Peter也常常在思索自己是否配得上MJ,夠唔夠資格同Avengers並肩作戰。其實某程度上這是Uncle Ben之死的影響,令Peter一直處於自責,往往想做得更多,但又經常質疑到底自己係咪真係有本事可以成功。電影Spider-Man 2將Peter的Self-doubt當成電影中一個極為重要的元素,而最近的Homecoming也有在此着墨。

 

Wisecracking Spider-Man

 

 

Well,大家都知道Spider-Man係嘴砲無雙,大戰反派都不忘爆幾句笑話同抽下水咁,但係究竟Peter係咪真係帶起面罩就自信爆棚目中無人串串貢呢?其實Peter都係一個普通人,遇到大壞蛋,面對生命危險都會驚,講笑話,串人都只係佢用黎掩飾自己內心嘅驚恐同安撫周圍嘅群眾。Peter之所以係一個英雄並唔係因為佢唔怕死、唔怕惡人,而係因為佢不論心底有幾怕,為左保護市民同自心愛嘅人,佢都願意企出黎面對一波又一波嘅敵人。

 

No One Dies

 

 

死亡同Peter好似係come with a package咁,佢嘅生活中真係點都有人死,Peter嘅父母、Uncle Ben、Captain Stacy、Gwen、Ben Reilly、Ezekiel、Charlie、JJJ Sr.等等都喺Peter生命中一個一個咁逝去,佢地嘅死更令Peter堅強咁生活落去,更立下No one dies嘅決心,要保護所有人。當然呢個係冇可能嘅事,但Peter嘅決心都令人折服。

 

Teenage Superhero

 

 

Spider-Man喺主宇宙入面算係早出道嘅超級英雄,但另一方面佢出道時只得15歲,難免會有不成熟同意氣用事嘅時候,亦常常越幫越忙,又經常同其他英雄大打出手。另外,佢亦都好想得到其他人認同,時常為了Daily Bugle失實嘅報道而煩惱。喺睇Spider-Man系列嘅時候,我地好似陪住Peter一步一步咁成長,成為宜家新進英雄嘅老前輩。

 

Science Genius

 

 

Peter係一個科學天才,15歲時已經憑一己之力研發出web fluid,至今都未有其他人可以複製得到。而且常常在戰鬥中透過觀察敵人,製作出不同道具去剋制敵人。又開發出各種特製戰衣同裝甲去應付各種環境同危險。科學天才呢一面係Peter一個十分重要的特質,亦係佢同大部份英雄有所分別嘅地方。

 

Peter Parker or Spider-Man?

 

 

Spider-Man系列其中一個吸引人追睇嘅原因就係除左睇Spider-Man收拾惡棍之外,我地仲可以睇Peter點樣平衡佢嘅日常生活同打擊罪惡。Spider-Man就係你同我,後生嘅時候要讀書考試,出到社會要揾工賺錢應付仆街老細之餘又有同朋友聚會、追女仔等等嘅日常生活。對我地普通人黎講都已經忙到踢哂腳,Peter仲有Spider-Man呢個身份要兼顧呢!到底係照顧重病嘅Aunt May,抑或係去捉拿劫匪;到底係去同MJ約會,定係去阻止Sinister Six呢?睇Peter如何喺生活中作出各種決擇,面對生活嘅高低起伏亦係Spider-Man系列最吸引大家嘅地方。

 

Just Your Friendly Neighborhood Spider-Man

 

 

一句到尾,大家都係中意Spidey夠貼地,夠討喜,睇佢嘅經歷就好似睇緊隔離屋陳生個仔成長咁姐嘛。究竟點先叫真正嘅蜘蛛俠?我打完咁大段文都係唔太知,不過我只係知道佢對唔同人有唔同嘅意義。十個人見到嘅Spidey都會唔同,比較黎究竟有咩為呢?

 

 

(上文主要refer返主世界同Ultimate版嘅Peter Parker/Spider-Man,求原著撚、Tobey撚、Andrew撚、MCU撚等等手下留情)

你可能感興趣:

關於 Damian W

喜歡閱讀美漫,平時亦花大量時間煲劇。

發表迴響