首頁 > 美漫評論 > [DC]Zero Hour

[DC]Zero Hour

Hello, 又係我, 一直以嚟都好想分享下咁多年嚟, 睇過/買過嘅cross-over漫畫, 當中有好多都係10幾年前嘅產物, 有時執屋打掃時, 見到一本本收藏, 都不自覺攞上手回味一番, 我知道美漫喺香港始終少眾玩意, 不過都希望可以勾起大家嘅一啲回憶, 如果反應好, 我會定期更新

好, 本身我係Marvel粉絲, 不過細個嗰陣都有睇DC, 我依家對DC嘅印象已經好模糊, 不過DC有套Green Lantern(綠燈俠)會上映, 我突然諗起Zero Hour, 所以今次就講佢先(筆者2012-1-15  著)

由於好多情節我已經唔記得, 所以喺網上搵左啲料

1972863-k5

講呢個cross-over之前, 有少少背景要話俾大家知, DC呢間老牌漫畫公司, 咁多年以嚟出版過無數本漫畫, 但係以前一直對漫畫入面嘅角色, 情節, 時間觀念等描述, 一向都亂到9彩, 例如今個月出版嘅漫畫, 一本講嘅少年超人, 另一本就講緊中年嘅超人, 但時間上, 大家又生活喺現代, 角色之間嘅關係又前言不對後語, 長遠嚟講, 不但搞亂讀者, 仲會影響角色成長, 同讀者追看意欲, 所以, 喺1985年, 佢地做左個壯舉, 就係編寫一個大型cross-over去將所有人物故事矯枉過正, 個概念係, 喺DC漫畫世界中, 係存在平行宇宙空間, 佢地統合所有角色嘅其中一個版本, 放喺同一空間發展主線故事, 其他嘅歸納為其他不同嘅支線世界, 我聽講, 呢個project嘅主力搞手仲為左資料搜集, 一次過睇返晒咁多年出版過嘅漫畫 , 之後編寫Crisis on Infinite Earths呢個大型cross-over…

不過小弟1985年嗰時都未開始識追美漫, 我今次講嘅cross-over其實係Zero Hour: Crisis in Time, 佢係1994年出版, 其實佢嘅出現, 係因為Crisis on Infinite Earths仲有好多漏洞要跟進, 所以再嚟多個同平行宇宙有關嘅大堆頭故事 (其實DC搞左咁多年, 個時間線依然好混亂, 往後都仲有呢類故事, 如近期嘅Final Crisis)

故事講述, 超人復活之前, 曾經有幾個替身出現, 其中一個Cyborg Superman, 呢條友其實係奸嘅, 佢後來摧毀左Hal Jordan(亦即綠燈俠)嘅居住城市 – Coast City, 綠燈俠精神崩潰, 失去控制…

tgcomics6028

Cyborg Superman

Green_Lantern_Vol_3_49

失去理智後, 殺死同伴, 取去其綠燈指環嘅Hal Jordan

佢一路追求更強力量, 試圖改變歷史, 拯救Coast City… 與此同時, DC世界開始出現混亂狀況, 有好多唔同版本, 唔同空間嘅人物同時出現, 原因係有一股力量喺時間盡頭一路刪除清空所有嘢, 令時空壓縮, 空間交錯, 幕後大黑手就係綠燈俠…

220px-Zerohour_perez

變成Parallax嘅綠燈俠

Kyle_Rayner_07

Hal Jordan暴走後, 當時代替佢嘅另一位綠燈俠 – Kyle Rayner

Zero Hour最特別嘅地方, 就係佢嘅期數係倒後, 即4, 3, 2, 1, 0咁去, 最後各英雄經歷不同遭遇後聯手制止綠燈俠, 打到最後, 宇宙重生, 世界由一片空白再從頭開始, 漫畫有幾頁紙係真係空白, 俾佢吹脹 … Hal Jordan雖然當時係死左, 不過後來嘅故事, 佢已經從生, 亦歸隊做返綠燈俠

嗰陣細個, 初中, 其實無咩零用, 不過唔知點解可以有錢去買齊呢套書, 唔好以為Zero Hour得5本, 佢前後有好多關連期刊(Tie-in)同佢有連繫, 到最後出完0期之後, 整個月嘅所有DC漫畫期刊都定為0期, 成40本#0期嘅書都買齊, 依家諗起, 真係”R”爆頭, 嗰時啲錢點得嚟…

回想起, 佢最後嗰期#0, 成個封面白色, 真係好有搵笨之嫌, 咁多年來, 我最深印象就係最後有幾頁堅係空白…

補充

超人之死 => Emerald Twilight => Zero Hour: Crisis in Time (連結於小虎文章)

你可能感興趣:

關於 DONPOON

一個留言

  1. 正,期待更多故事,尤其是依家咁多美漫電影

發表迴響