首頁 > 影視娛樂 > Kingsman: The Golden Circle 短評

Kingsman: The Golden Circle 短評

首先同大家Say個Sorry先,今次得篇文無圖睇,正如編劇無心機寫好個劇本同導演無心機拍一樣,我都無心機排圖。

本來睇預告我都已經無乜Feel,因此不會有太高期望,有動作有笑料睇完就諗住收貨,結果? 不是失望,係愈睇愈火滾。

基本上本作係上集既replica,大魔頭有驚天滅世陰謀,只餘下主角單打獨鬥救世界。唯一新意就係安排Kingsman第N次被滅團後要投靠美國老表級機構Statesman。是次賣點係動作多左,卡土強左,但取而代之就係故事長達141分鐘,兼且故事空洞冗長,悶到嘔電。感覺上就好像先寫完主角的故事線再看看如何加插其他新舊角色的戲份,結果就是除了Eggsy外所有角色都好像附加部件一樣,即使全部刪去戲份也不怎影響觀感。

既然說起角色就由此開始吧,今作最教人氣忿的地方就係角色的編排,好聽一點就是今集星光熠熠,但除了主角外,真係所有角色出場不到十分鐘就被強制退場或死掉,有不少還是重要角色,既然如此安排佢地出場就只為海報上的排場好看d? 而且各角色發揮近乎係零,Eggsy只係重演上集既人物性格,Harry Hart即使翻生亦沒神沒氣似喪屍多過似主角,Julianne Moore演既奸角直頭是不知所謂,表面friendly但做唔到內裡心狠手辣,最浪費係鐵甲飛拳同Channing Tatum,真正行行企企無貢獻。

上集其實都談不上係佳作,前半實在很無聊,只係後半動作戲精彩救到部戲,結果今次就將上集成功既地方複製過來,每一場動作都似足上集最終戰,某d鏡頭亂到不得了,比較有睇頭既只係今集個d超強既新道具,強力先進得絕對無敵,但倒轉頭咁講,如果佢地科技力真係咁強勁,一開頭應該無咁簡單被人用導彈滅團吧? 完全無一d反擊機制? Are you kidding me?

上集我仍記得爆煙花一幕,今集出奇地看完整套戲但完全無一幕我係有好深印象,諷刺地連編劇都藉角色係咁講同播返上集爆煙花,係咪即係自知今集削過上集呢? 總括而言,今集完全大失水準,已經唔只係平庸而係懶到出汁,英美合作其實潛質好大,但製作人完全唔打算玩文化衝突反而只係玩stereotype,真係你唔悶我都悶。個個都話最衰Matthew Vaughn唔拍Kick-ass 2搞到續集好差,well,現實證明Kingsman 2比 Kick-ass 2更不堪。

4/10

關於 Jacky.TalkComic

由電台跳到網台,由紙媒跳到電媒。電影,電視劇,動畫,遊戲,音樂,模型,Figure全修,吹水唔抹嘴的癲喪毒廢一名。

發表迴響