[面具背後:演員們的軌跡]Nick Fury – Samuel L. Jackson Part Two:Road to Color Revolution

===PART ONE===

Samuel L. Jackson於2011年榮登健力氏世界紀錄大全,

因為佢成為咗「史上最高票房明星」,

而呢個紀錄只係由佢於1991年嘅” Jungle Fever”開始計起嘅過百部作品,

總票房合計有74億美金。

對於一般觀眾而言只係知道近乎乜戲都會見到佢,

甚至有人話佢濫拍,爛片多過佳作,

但作為一個演員,佢只係做好本份而已,經理人接咗乜拍囉。

但係大家冇為意嘅係,無論係咩片都好,SLJ都會全力以赴,

上至專業人士, 下至平民一般人一個,此乃演員之專業。

 

在上一篇中有一張圖,圖中有SLJ所寫嘅一句說話”Art is the master, I am its slave!”

此乃佢嘅宗旨,亦係佢作為演員嘅格言。

早於佢演戲初期,二打六跑龍套角色多得數唔清,

但即使出鏡只有短短幾秒,SLJ都唔會嫌棄,

因為每個角色都係一個機會,一個俾佢成名嘅機會,

同時嚴守演員操守作鞭策,令SLJ成為行內公認最努力嘅配角。

 

之前曾講過SLJ亦曾受毒品及酒精問題困擾,

當佢發覺到呢個問題非常影響佢嘅仕途後便決心戒除,

當佢成功戒毒戒酒後得到一個對佢而言非常重要嘅角色,

呢個角色雖然只係配角,但其於業界嘅代表性可謂數一數二,

講緊嘅就係Spike Lee導演嘅”Jungle Fever”。

 

 

喺戲中佢演一個有毒癮嘅人,咁啱佢接拍嗰時係喺療養院出返嚟,都可謂相當諷刺。

於是SLJ就運用過往嘅經歷嚟演好呢個角色,神似程度係令人驚愕,

如是這佢獲得紐約影評人協會嘅最佳男配角、肯薩斯影評人協會最佳男配角,

以及當年康城影展特別為SLJ增設嘅最佳男配角獎。

眾所周知,康城本身係冇「最佳男配角」呢個獎。

 

努力終於得到認同,於是SLJ比以往更加勤奮。

1991年嘅《危險人物》(Pulp Fiction)相信係最多人對SLJ嘅第一印象。

戲中飾演專業殺手嘅佢喺亂槍掃射下竟然絲毫無損,

於是佢視呢件事為神嘅宣召,並金盆洗手唔再殺人,

但佢喺餐廳度遇上打劫嘅雌雄大盜,

本可以一槍了結呢兩個賊嘅佢選擇以銀包入面嘅千五蚊美金以及口才說服佢地離開。

 

 

套戲本身好睇冇錯,但SLJ喺戲入面嘅表現可謂係全體演員中最出色嘅一個,

亦因呢個爆炸頭殺手嘅角色令到好多喜歡上呢位演員,當年佢已經係46歲。

 

 

隨住知名度愈嚟愈高,佢嘅電影角色戲份亦愈嚟愈吃重。

95年同布斯韋利斯合演《Die Hard with a Vengeance》,

98年與奇雲史柏斯合演《冇數講》,

99年大家都好熟悉嘅《星戰前傳》中嘅Master Windu,

連打都唔使打,坐喺度已經夠哂台型。

2000年再同布斯韋利士合作嘅《不死劫》,

以及同年由佢一個擔正嘅火爆動作片《辣手刑警》。

呢套戲入面嘅SLJ真係型到冇朋友。

 

 

SLJ於演技上最大最強之處,就係做到令人信服,

由《侏羅紀公園》嘅科學家、絕地武士、以及《特警雄風》中嘅韓度警長,

所有角色都係有層次,而且由肢體、語氣、眼神各方面,

都足以令人信服佢係一個「專業人士」,

你話如果叫Justin Bieber著起白袍,有冇人信佢係醫生或者科學家?

順帶一題,SLJ喺《侏羅紀公園》入面係嗰個得返隻手。

 

 

由Windu大師至到韓度警長,SLJ已經係「大阿哥」嘅代名詞,

一講到要搵人扮大師級或老差骨,佢自然係首選。

2006年嘅”Home of the Brave”係一部美伊戰爭電影,

講一班軍人於戰場返回家後不能再重過正常生活,SLJ就喺當中扮演軍醫。

作為一個醫生,任何情況下都要保持冷靜,否則便唔能夠作理性判斷。

戲中經歷戰火,返回家中看似一切依舊,但卻三更半夜都瞓唔著。

一直抑壓嘅心理創傷到片尾先至爆發出嚟,

亦係全片各主角故事線中壓軸嘅一場高潮戲。

同年亦有大家得好開心嘅《毒蛇嚇機》,又係演老差骨。

 

 

2008年嘅《越空行者》佢飾演一名獵殺「閃客」嘅神秘組織嘅老練戰士,

同年亦有令大家開心到飛起嘅《Iron Man》,

估佢唔到咁喺片尾字幕後來個客串,仲要係做Nick Fury,

自始,SLJ進入咗驚奇漫畫嘅宇宙中,

家陣大家就可以睇到呢個平時行行企企嘅指揮官到底有幾勁。

順帶一題,漫畫中Ultimate版嘅造型係根據SLJ而畫,後嚟電影版順理成章搵佢演返。

 

 

至於我之前講過,SLJ嘅價值遠超一個演員,

同時亦講過佢曾經係黑人維權運動嘅活躍份子,

只要將呢兩句合拼起嚟,自然就會得出答案。

都仲係唔明點解?

Well,佢嘅存在改變咗荷里活,甚至整個美國嘅文化價值觀。

 

 

唔講馬丁路德金,反而我想講下丹尼高化(Danny Glover)嘅「鐵血戰士事件」。

白黑配幕前演出其實自70年代或更早期已經出現,

但《轟天砲》嘅成功令到呢個配搭變咗賣座公式。

丹尼高化喺《轟天砲》跑出咗之後,接替州長演《鐵血戰士2》,

但此舉引發全國性嘩然。因為於當時黑人演員並未太被人接受,

白黑配已經係極限,兼且黑必須係第二男主角,唔能夠擔正,

所以「P2」一出嗰時突然由一個黑人做第一男主角,所以引起咗激烈嘅爭議。

 

差唔多同丹尼高化同期嘅 SLJ,佢嘅成長環境就係處於黑白未共融,

馬丁路德金事件令佢感到應為有色人種做返D嘢,所以先至成為活躍維權份子,

後來完成學業後投身演藝界,不過佢嘅抗爭仍未完結,只係形式唔同咗啫。

 

SLJ喺呢個由白人主導嘅市場上,佢默默耕耘,以「專業」令人認同,

令大家知道白人做到嘅事,佢一樣做到。

不難發覺SLJ同愛迪梅非有相同之處,

就係對於膚色種族問題片,SLJ都經常參與其中。

說到底,SLJ將顏色革命,由街上抗爭,轉移到大銀幕上,

而且影響性不單是物理性質,更加係心理層面上。

 

 

1993年嘅“Amos & Andrew” SLJ同尼古拉斯基治合作,

於戲中佢飾演一名事業成功嘅黑人,喺一個中產社區中買咗間屋住,

但住喺嗰度嘅全部都係白人,基治就係飾演一個賊。

當嗰個社區有人報警,全世界都以為SLJ係賊,相當諷刺。

《Die Hard with a Vengeance》更加唔需要解釋,戲中大玩黑白不和問題。

 

 

2008年嘅“Lakeview Terrace” 就同「貓頭鷹俠」Patrick Wilson合作,

今次佢演一名警察,更加係黑人至上主義者,住喺Patrick Wilson隔離。

鄰里不和升級至種族問題,SLJ嘅角色將所有事都視作對黑人嘅歧視,

呢一名奸角係SLJ近年最惹人討厭嘅角色。

 

 

SLJ成功以實力令到各界認同,

而喺佢聲名大燥嘅時期亦係黑人演員開始獨當一面、能擔大旗演出嘅時候,

我唔可以話呢樣嘢完全係SLJ嘅功勞,

但佢嘅出現、佢嘅專業、佢嘅態度完全係令到全世界對黑人演員改觀、接納,

而本身負面新聞唔多嘅佢,更加係一代教材,

說明演員應該係喺台上發光、台下收斂。

一個正面嘅存在、一個良師益友、一個真正敬業樂業嘅專業演員,呢D都係SLJ嘅代名詞。

 

 

之前講過,SLJ家陣嘅形像自《星戰前傳》起已經係大師父級,

唔難發覺喺2000年打後好多電影佢都只係出嚟壓場,

再俾新仔表現機會,《S.W.A.T》就係其中一個例子。

無架子係SLJ另一大優點,佢唔介意同新人合作,

更應該說佢喜歡提攜後輩,呢一點同丹素華盛頓有點相似。

 

 

話說,SLJ於戲中唔係好使靠造形嚟營造氣勢,

不過拍《星戰前傳》時,佢問過佐治魯卡斯光劍有咩色選擇,

但係唔係藍就係綠,於是佢只有一個要求「整把紫色嘅劍俾我。」

如是這,喺星戰世界中就出咗唯一一把紫色嘅光劍,

玩具又可以食多條水,everybody’s happy,everybody’s win。

 

關於 Jacky.TalkComic

由電台跳到網台,由紙媒跳到電媒。電影,電視劇,動畫,遊戲,音樂,模型,Figure全修,吹水唔抹嘴的癲喪毒廢一名。

發表迴響

這個網站採用 Akismet 服務減少垃圾留言。進一步了解 Akismet 如何處理網站訪客的留言資料