當初得知RR簽約飾演 Hal Jordan,熟悉佢戲路嘅人齊齊 say no,
唔係話大家唔鐘意Green Lantern,而係RR的而且確係唔啱做呢個角色。
就算冇睇漫畫如我般,都知道Hal Jordan唔係一個小丑,
無奈地,今次嘅呢部綠燈俠將兩者劃上等號。
不是說硬漢就唔可以搞笑,但幽默感跟滑稽是完全兩回事,
不是說把劇本寫得搞笑一點再搵個打得嘅喜劇演員來演就叫好,
《狼人外傳》中佢飾演 Deadpool,的確係good casting,
話哂, Deadpool是智慧型的膠,即是幽默感,而非硬膠。
本人可謂為前RR的死忠fans,最低限度,搵得到佢嘅戲嘅DVD,我全部睇哂。
沒錯,RR又係一位靠喜劇起家嘅演員,佢嘅演藝事業,最早可以追溯至1990年。
童星出身嘅佢,出道作是一部美國兒童電視劇”Fifteen”,但佢卻是來自加拿大。
之後在美、加兩地參演了一大堆過目即忘嘅電視劇以一套莫名其妙嘅電影 “Ordinary Magic”。
如我所說,「過目即忘」,即使他曾出現在”X-Files”,但有誰記得佢?
演藝事業完全沒有起色嘅Ryan 返回老家並一度想過放棄,
幸得到當年”Fifteen”中同佢合作的同鄉演員Chris William Martin鼓勵,
兩支公執好包伏,齊齊搬到L.A.,住喺廉價旅館作累鬥累持久戰,
當時二人可謂霉到爛,RR 的吉譜車車門壞掉了都沒錢修好,
結果有四個月裡,RR就是開著一架無門的車………………………..
喺97年,RR終於得到一個真正令佢事業上軌道嘅角色,
於一部叫”Two Guys, a Girl and a Pizza Place” 的電視劇中擔當第一男主角。(後改名”Two Guys and a Girl”)
呢部作品係講述兩男一女鄰居關係嘅處境喜劇,
本來開季時這部作品嘅收視低得可憐,第一季未播完已經面臨被砍嘅危機,
好在於季未成績有所改善,累積了一定人氣,不但迴避咗被砍嘅命運,更播了整整四季。
呢部作品劇情抵死幽默,整体評價相當不錯,讓觀眾對佢留下深刻印象。
就在”Two Guys and a Girl”結束後,RR遇上咗佢久候嘅機會:一部令佢一炮而紅的作品。
香港02年曾經上映嘅呢部《凸種高材生》(National Lampoon’s Van Wilder)可謂係RR嘅經典作。
佢喺呢部電影中飾演一位已經讀咗7年以上名牌大學嘅「大少爺高材生」,
吃喝玩樂無一不精,唯獨讀嚟讀去都畢唔到業,結果佢成為呢間大學嘅「國王」。
又係時候講解一下小知識:
National Lampoon 其實係一本創刊於1970年代嘅諷刺式搞笑雜誌,
及後跨媒體的發展至出版書籍、混合了廣播劇及音樂的錄音帶及CD、電台節目、劇場、電視節目及電影。
這間公司出品的電影大多都有”National Lampoon’s “字樣,
而佢嘅作品共通點,都是低成本喜劇,近似王晶式屎尿屁元素無一不歡。
National Lampoon’s 品牌 + RR 的占基利式喜劇演繹方法,(RR的確是在學占爺,不信看多兩部佢嘅戲)
“National Lampoon’s Van Wilder” 真的令佢聞名於世,從此講起RR我就會諗起一個後生版占爺。
03年可謂RR 衣錦還鄉嘅一年,因為佢返咗老家加拿大並主演咗一部動作喜劇”Foolproof”,
故事講述三個經常發夢做神偷嘅打工仔喺真正嘅大盜威脅下必須潛入一棟高設防的商廈盜取一些東西。
呢部作品係RR第一部參演的動作片,不但故事低能爆笑,而且更充滿職業特工隊式嘅動作場面。
同年佢喺有客串另一部特工喜劇 “The In-Laws”,飾演米高德格拉斯嘅兒子。
喜劇無可否認係RR 最擅長嘅項目,但自04年開始,佢便開始向不同種類的角色挑戰。
佢於”Blade: Trinity”中所飾演 Hannibal King 係大部份影迷對佢嘅第一印象,
唔奇嘅,因為呢部作品係佢健身後第一部演出嘅戲。
滿身肌肉以及留著濃密鬍鬚,同以往陽光男孩嘅風格完全唔同。
同年佢演出咗一部翻拍嘅作品”The Amityville Horror”,
演一位被邪靈附身企圖殺害妻兒嘅父親,係佢首次演出有黑暗面的角色。
順帶一題,戲中嘅佢差d 殺咗Hit Girl。
喺RR嘅事業愈嚟愈順景時,佢嘅演出亦愈嚟愈商業化,
“Two Guys and a Girl”嗰一種「無雜質」嘅演出亦離RR 愈嚟愈遠,
2005年係同「舊」Ryan Reynolds說再見的一年。
佢最後兩部作品:”Waiting…”及”Just Friend”於同一年上映,
兩部都是低成本電影,且兩部都是「無雜質」的愛情喜劇。
前者是一部關於快餐店的胡鬧喜劇;
後者則是一部講RR事業有成後重遇初戀情人卻被花痴女死纏,
形成兩女爭一男的爆笑喜劇。
至於我所說的「無雜質」係點解?
就是說這種低成本電影不太計較票房,
所以演員們可以隨心所欲地發揮,甚至即場爆肚。
但可惜 RR開始走紅,往後演出的作品都實在太過計算,
抱歉呢,「新」Ryan Reynolds,我投靠別人(湯姆)算了。
RR in Just Friend
話雖如此,他之後的這部”Smokin’ Aces”我可是愛得要命,
這部戲中他完全收起了所有喜劇細胞,把硬漢形象發揮到100%!!!
戲中他飾演一位年青FBI探員,
故事講述賭城的的黑幫老大下了一道一百萬美元的追殺令,
誓要鏟除眼中釘 – 一個名為Ace的三流魔術師。
而Ace在走投無路下,投靠FBI當上污點證人,
但五路殺手齊集他所在的酒店,FBI與各路殺手展開一場血腥廝殺。
順路賣一下廣告,這部電影我個人可是極度推薦,
不但卡士強勁,連劇本都教人心服口服。
話先說在前頭,首一小時可是全文戲,交待黑幫老大及各路人馬的關係背景,
後半部份才是戲肉,兵賊攻防戰可是緊張得讓人透不過氣來,經典!!!!
硬漢、搞笑高手、陽光男孩,RR通通做過,
所以在08年他嘗試新角色:親切溫柔的單親爸爸。
“Definitely, Maybe” 為RR帶來不少新客源,因為這部電影有不少女性迷上咗佢。
的確,有個咁靚仔身材咁好又父愛爆棚嘅好男人,邊有人唔愛?
09年佢終次遇上命中注定嘅角色:Deadpool。
正確來說應該是Wade Wilson,因為變身後的Deadpool是另一位演員來的。
喺《狼人外傳》雖然只有短短十分鐘戲份,
但完全符合Wade嗰種「衰口臭」、口沒遮柵及幽默感。
而同年佢嘅主力作品”The Proposal”又走愛情喜劇路線,
但今次卻是爛戲一部…………………
說過了吧? 「無雜質」年代經已結束,
計算好的喜劇根本就不好笑,而且RR在戲中主力賣肉而已,失望。
2010年他又作出新嘗試,個人SOLO近100分鐘!
如果「127小時」呼聲真的咁高,咁大家應該睇下”Buried”,
RR飾演的角色係一個於伊拉克被困在木箱中活埋的美國商人,
手上只有一把手電筒、一個火機及一部電話,就是在這個木箱中玩足95分鐘!!!!
沒有回想片段,沒有藍天白雲,沒有第二位露面的演員,就這樣的One Man Show,服未?
2011年對於RR來說是傷亡慘重的一年,佢演出嘅《綠燈俠》全球票房 PK之餘,
連另一部電影”The Change-Up”都連帶仆直,
到底是「帶練」方程式嘅地獄組現像重現,
還是《綠燈俠》太過粗製濫造死有餘辜?
唔理係邊一種,今年嘅成績都足以令RR認清楚到底自己應走邊條路,
以及認清楚咗自己嘅界限係喺邊。
雖然兩部作品遭遇滑鐵盧,但RR不愁冇戲開,嚟緊有幾套大片等緊上,
如同丹素華盛頓合作嘅”Safe House”,同樣係漫畫改編嘅”R.I.P.D.”以及萬眾期待嘅”Deadpool”!
最低限度,呢幾年唔怕冇工開先。
RR嘅感情生活方面,確定嘅關係有幾段,
最先嘅係 同加拿大女歌手 Alanis Morissette於2004年訂婚,但於2007年分手。
一年時間都未夠,RR搭上咗 Scarlett Johansson
,並於2008年9月拉埋天窗,但兩年鬆D 二人就散咗,
令我不禁懷疑佢同SJ 嘅婚姻係為咗綠卡而存在……………………………………………..